Аудиториядан ташқари машғулотлар жараёнида бўлажак ўқитувчи шахси маънавиятини шакллантириш

Педагогика олий таълим муассасалари олдида турган долзарб вазифа нафақат интеллектуал салоҳияти юқори, балки маъ­навий жиҳатдан ҳар томонлама камол топган ўқитувчи шахсини шакллантиришдан иборат бўлиб қолмоқда. Мазкур вазифани муваф­фаққиятли ҳал этиш учун аудитория машғулотлари билан бирга, аудиториядан ташқари машғулотлар интеграциясини таъминлаш лозим. Реал таълим амалиёти педагогика олий таълим муассасаларида бўлажак ўқитувчиларнинг маънавиятини шакллантиришга доир аудиториядан ташқари иш шакллари, анъанавий давра суҳбатлари, учрашувлар, тадбирлар йиғиндисидан иборат бўлиб қолаётганлиги, мазкур жараённи ташкил этишнинг самарали технологияси ишлаб чиқилмаганлигини кўрсатади. Мазкур ҳолат аудиториядан ташқари машғулотлар жараёнида бўлажак ўқитувчиларнинг маънавиятини шакллантиришнинг назарий ва амалий жиҳатларини тадқиқ этишни тақозо этади.